O filial do equipo obradoirista pasou a denominarse Obradoiro Ames e a mudar a súa sede ao Milladoiro tras un acordo entre o Concello de Ames, o Monbus Obradoiro e a Fundación Obradoiro. Ademais de que o filial dispute os seus partidos como local na vila amesá, o acordo inclúe outros beneficios, como un 10% de desconto acumulable nos abonos do Monbus Obradoiro, invitacións para partidos da Liga ACB, a celebración dun adestramento-exhibición do primeiro equipo no Milladoiro, ou a colaboración entre o Obradoiro CAB e a AD Básquet Ames.

Ademais de poder asistir de balde aos partidos, que se disputan no pavillón municipal do Milladoiro, a veciñanza e as afeccionadas e afeccionados obradoiristas poden seguir este e todos os encontros que xogue o Obradoiro Ames como local no Milladoiro, a través da canle de Youtube do Concello de Ames.