Os irmáns Paula e Manuel Blanco, veciños de Ortoño, participaron a fin de semana do 25 e 26 de febreiro no Campionato Galego de Kickboxing, na modalidade “tatami sports”. Paula Blanco proclamouse campioa galega en “light contact” e subcampioa en “pointfighting”. Pola súa banda, o seu irmán pequeno, Manuel Blanco, logrou o título de campión na súa categoría en “pointfighting” e rematou segundo en “light contact”.

O Club de patinaxe Sarela, de Bertamiráns, e o Club de patinaxe artística Omega, do Milladoiro, organizan o vindeiro sábado, 1 de xuño, a décimo terceira edición do Encontro de patinaxe artística das escolas deportivas municipais do Concello de Ames. O evento desenvolverase en horario de mañá no pavillón municipal de Bertamiráns. O programa inclúe exhibicións dos clubs de patinaxe amesáns, que realizarán distintas coreografías. Este evento conta coa colaboración do Concello de Ames a través da Concellería de Deportes.

Ames acollerá ao longo deste verán 9 campus e campamentos deportivos, organizados por clubs e entidades deportivas locais coa colaboración do Concello de Ames, a través da Concellaría de Deportes, e da Deputación da Coruña. Deste xeito, a rapazada amesá poderá escoller entre propostas de fútbol, patinaxe, atletismo, fútbol sala ou baloncesto, con propostas para idades dos 4 aos 18 anos, de xuño a setembro. Todas as iniciativas que comprenden a oferta contribúen á conciliación e á aprendizaxe dos valores do deporte.

A pasada fin de semana varios integrantes de Ames Atletismo acudiron ao Campionato Galego de probas combinadas e ao control de marcas da Federación Galega de Atletismo. Ambas competicións se celebraron na pista cuberta da cidade de Ourense. Destacaron as actuacións de Mateo Posse, que logrou o bronce nas combinadas sub20, e de María Estévez, que acadou a mínima nacional nos 600 metros lisos.