Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas


Novas

A Comisión do Rural realiza a avaliación final dos Orzamentos Participativos 2018

[06-04-2019] Esta semana reuníronse os representantes das distintas parroquias que integran a Comisión de Orzamentos Participativos, xunto con membros do goberno municipal de Ames. Esta xuntanza realizouse co obxectivo de informar da execución das propostas seleccionadas e valorar e avaliar conxuntamente o desenvolvemento do proceso. Tamén se deu conta dos proxectos que están pendentes de executar e en fase de licitación. No Orzamento municipal de 2019, aprobado de xeito inicial o pasado 14 de marzo, recóllese unha partida de 132.000 euros para os Orzamentos Participativos deste ano 2019.

Unha charla informativa da UCGAL no Milladoiro asesora sobre o subministro do gas

[06-04-2019] O local social de JUPEMI (Club de Xubilados e Pensionistas) no Milladoiro acollerá a charla informativa “O consumidor fronte ao subministro do gas”. A actividade, impartida por persoal técnico da Unión de Consumidores de Galicia, terá lugar o mércores, 10 de abril, ás 19:30 horas. A asistencia é gratuíta e libre ata completar o aforo. A charla informativa vai dirixida ao conxunto da poboación amesá.

A Deputación apoia con 200.000 euros a creación dun centro de coworking centrado no sector audiovisual en Ames

[05-04-2019] O Concello de Ames e maia Deputación da Coruña asinaron esta mañá un convenio para a adquisición dun inmoble, situado no polígono industrial do Milladoiro, que será usado como espazo de traballo colaborativo e que terá como finalidade ampliar os servizos de apoio a iniciativas emprendedoras, proxectos empresariais ou iniciativas de autoemprego, con especial atención ao sector audiovisual. Segundo se recolle no texto do convenio, a Deputación cofinanciará algo máis do 35% dos custes do local, cunha achega de 200.000 euros.

O Concello de Ames abre novos viarios de servizo arredor do novo centro de saúde do Milladoiro

[05-04-2019] O Concello de Ames está executando a escavación dos viarios de servizo do novo centro de saúde do Milladoiro. Estanse habilitando dous viarios:un que vai dende Travesía de Porto ao cruce de Agro do Medio con Agro da Madalena e outro que dá continuidade a rúa das Camelias. Estas obras, que teñen un custo de 35.211,46 euros, IVE incluído, están sendo executadas pola empresa Construcciónes Iglesias Mera S.L. Está previsto executar a escavación, pero de momento estes viarios non se pavimentarán. As obras consisten en acadar a rasante definitiva no entorno das obras do centro de saúde en dúas vías de nova apertura.

O Coro Son Elas celebra hoxe o I Concerto Solidario en beneficio de Obra Social Pediatría

[05-04-2019] A Casa da Cultura de Bertamiráns acolle hoxe, a partir das 20.00h, a primeira edición do concerto solidario en Ames a beneficio de Obra Social Pediatría. O evento musical será presentado pola actriz Belén Constenla, e contará coas actuacións do Coro da EMMA, Danzaya, Federico Pérez, Fran Rei e Son Elas. As entradas xa están dispoñibles en diversos locais comerciais do concello, en réxime ordinario cun custo de 4 euros mentres que as “Fila 0” custan 3 euros. O recadado destinarase a reforzar as liñas de investigación postas en marcha no departamento de pediatría do CHUS.


Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925