Ayuntamiento de Ames

Menú [Saltar]

Ayuntamiento de Ames

[http://www.concellodeames.org]


Inicio Ames digital Noticias


Noticias

Unha vintena de persoas completaron o curso organizado pola OMIX de Ames “English Today”

[25-05-2019] Este xoves, 23 de maio, chegou ao seu fin unha nova edición do curso “English Today” organizado pola Concellaría de Mocidade como aposta pola formación das mozas e mozos do concello en linguas. A actividade, encadrada dentro do programa de formación xuvenil da Oficina Municipal de Información Xuvenil (OMIX), buscou ofrecerlle ás e aos asistentes unha aprendizaxe práctica do inglés para o día día, destinada á comprensión e expresión do inglés empregado en contextos e situacións cotiás como unha entrevista de traballo, unha viaxe ou unha consulta médica. Neste curso, que tivo unha duración de catro meses, completáronse as 20 prazas ofertadas.

A Aula CeMIT de Ames ofrece unha ampla oferta de actividades para todas as idades durante os meses de xuño e xullo

[25-05-2019] A aula CeMIT de Ames, situada na Casa da Cultura de Bertamiráns, presenta a súa programación de cara aos meses de xuño e xullo, coa vista posta nas vacacións escolares. Así, de cara á estación estival, realizaranse un total de doce cursos, entre os que non faltarán os esperados cursos de verán para a rapazada ou os obradoiros de nivel medio para adultos, centrados en cuestións como a rede, o móbil, o traballo colaborativo e o correo electrónico. A programación tamén incluirá un ciclo de empregabilidade, exames EMA e unha videoconferencia sobre compras e contratacións a distancia. Para obter máis información ou para reservar praza en calquera destas actividades, as persoas interesadas pódeno facer a través da páxina web do CeMIT, achegándose á propia aula, chamando ao número de teléfono 682 373 753 ou enviando un correo electrónico ao enderezo cemit.ames@xunta.gal.

O Concello de Ames aproba o expediente de licitación da obra de construción do novo comedor do CEIP da Maía

[24-05-2019] A Xunta de Goberno Local aprobou este venres, 24 de maio, o expediente de licitación da obra de construción do novo comedor do CEIP da Maía, que conta cun orzamento de execución por contrata de 454.580,82 euros. Este proxecto, incluído dentro do Orzamento municipal de 2019, será sufragado con fondos propios do Concello de Ames. O pasado 9 de maio a Consellería de Educación, Universidade e Formación Profesional informou favorablemente sobre a solicitude de autorización presentada polo Concello de Ames o 26 de abril de 2019 do proxecto desta infraestrutura. O obxectivo é ampliar as prazas do servizo municipal de comedor escolar.

O Concello de Ames recibe unha axuda de preto de 70.000 euros para a mellora do viario de acceso ao polígono do Milladoiro dende a estrada Ventín-Coira

[24-05-2019] O Concello de Ames vén de recibir a resolución da Consellería de Economía, Emprego e Industria pola que se lle concede unha subvención para a habilitación e mellora de infraestruturas do parque empresarial do Milladoiro. Deste xeito, concédese unha axuda de 68.593,43 euros, para a mellora do viario de acceso ao polígono industrial do Milladoiro dende a estrada Ventín-Coira. O importe total desta actuación ascende a 85.741,79 euros, polo que o importe subvencionado é do 80%, mentres que o 20% restante será sufragado polo Concello.

Os cativos e cativas da EIM O Bosque convértense en expertos en seguridade viaria

[24-05-2019] A seguridade viaria foi o tema central durante a primeira quincena de maio na escola infantil municipal O Bosque. Por elo, as cativas e cativos da escola realizaron distintas actividades para coñecer a fondo esta temática, e mesmo deseñaron o seu propio circuíto para poñer en práctica todo o aprendido sobre sinais, medidas de seguridade e prioridades. O bloque rematou coa visita da Policía Local de Ames.


Aviso legal | Accesibilidad | RSS

© Ayuntamiento de Ames
Praza do Concello, 2, Bertamiráns. Tel: 981 883 002 - Fax: 981 883 925