Concello de Ames

Menú [Saltar]

Concello de Ames

[http://www.concellodeames.org]


Inicio Ames dixital Novas A exposición...


A exposición “Á violencia de xénero... dille NON” permanecerá no IES de Milladoiro ata as vacacións de Nadal

[06-12-2017] A exposición, que está composta por unha ducia de láminas, mostra diferentes situacións de violencia vinculadas ao control, á manipulación, ao abuso, á sextorsión e á chantaxe emocional. Dirixida á mocidade, o seu obxectivo principal é que as mozas, e tamén os mozos, aprendan a identificar condutas tóxicas en parella e teñan ferramentas para rebelarse contra elas. “Á violencia de xénero... dille NON” permanecerá no IES do Milladoiro ata o remate das aulas deste trimestre.


“Este é un tema que non podemos deixar limitado a unha data concreta. A desigualdade entre homes e mulleres, e nomeadamente a violencia machista, é unha problemática que se debe tratar nos centros de ensino durante todo o curso. No IES do Milladoiro traballamos fondamente cuestións ligadas á igualdade e ao bo trato, a través de obradoiros realizados en colaboración con distintas entidades. Neste caso, a exposición “Á violencia de xénero... dille NON” axudaranos a tratar as violencias máis sutís que se poden dar dentro da parella”, afirma a vicedirectora do centro, Marta Gende.

Expostos nos arredores da biblioteca do IES do Milladoiro, os paneis, cuxo deseño se aproxima á banda deseñada, abordan actitudes machistas como o control a través das redes sociais, a manipulación, os celos, a humillación, o abuso, a chantaxe emocional ou a sextorsión. A exposición ten como obxectivo concienciar á mocidade sobre as consecuencias negativas que os estereotipos de xénero poden ter nalgunhas relacións de parella. Por esta razón, os paneis presentan unha linguaxe clara que apela a mocidade de maneira directa. Ao longo destes días, o alumando do centro traballará estes contidos, mediante a realización de diferentes actividades didácticas deseñadas en función da idade de cada grupo, que no caso das xeracións máis vellas incluiránun cuestionario a partir do cal debater os contidos de cada panel. 

“Á violencia de xénero... dille NON” permanecerá no instituto do Milladoiro ata a chegada das vacacións de Nadal. Do mesmo xeito, as familias ou persoas interesadas en coñecer máis polo miúdo esta exposición poderán visualizala online a través da páxina web do instituto durante os próximos días. Esta exposición é unha iniciativa da Secretaría Xeral de Igualdade, que foi solicitada a través do Centro de Información á Muller de Ames (CIM), como parte da programación deseñada pola Concellería de Igualdade con motivo das actuacións do Día Internacional contra a Violencia de Xénero.

A concelleira de Igualdade e Servizos Sociais, Luísa Feijóo, destaca a importancia de investir en formación e prevención para tentar erradicar as violencias machistas da nosa sociedade. “Todas as formas de violencia de xénero teñen o mesmo sustento: os estereotipos e os mitos enganosos que moitas veces críamos xa superados e que, desgraciadamente, a poboación máis nova segue a reproducir de maneira preocupante. Por este motivo, desde o Concello de Ames cremos fundamental promover este tipo de actividades entre a xente moza, xa que elas e eles son o futuro”.

O 25N no IES do Milladoiro
O instituto do Milladoiro organizou dous obradoiros, co gallo do Día Internacional da Eliminación da Violencia contra a Muller, que se celebrou o pasado 25 de novembro. Un destes obradoiros realizouse en colaboración con Agareso, a Asociación Galega de Reporteiros Solidarios. Nel abordouse unha reflexión crítica dos estereotipos do amor romántico, a través do uso das novas tecnoloxías e coa realización de memes con mensaxes contrarias ás violencias machistas. O segundo dos obradoiros, que se realizou en colaboración co Centro de Información á Muller de Ames (CIM), tratou sobre a importancia do consentimento nas relacións sexuais.

Así mesmo, o alumnado de bacharelato do IES do Milladoiro realizou un acto conmemorativo o propio 25 de novembro, que consistiu nunha lectura de textos no Paseo da Igualdade. Alén diso, a biblioteca do centro xunto coa biblioteca do IES O Mosteirón, en Sada, realizou unha exposición na que se recolleron notas necrolóxicas co nome de todas as mulleres asasinadas no que vai de 2017. Nesta ocasión, tamén se levou a cabo unha unidade didáctica específica, para levar ao alumnado a ler eses nome e a reflexionar sobre a lacra que representa na nosa sociedade a violencia machista. Por último, as actividades incluídas nas conmemoracións do 25N acolleron a realización da campaña “Damos a cara contra a violencia”. A iniciativa consistiu en fotografar ao alumnado co lema da campaña “En negro contra as violencias” co que se sentise máis identificado. As fotografías pódense ver na propia web do centro.

Aviso legal | Accesibilidade | RSS

© Concello de Ames
Praza do Concello, 2, Bertamiráns. Tel: 981 883 002 - Fax: 981 883 925